ເມືອງໄຊຍະບູລີ ເຜີຍແຜ່ດຳລັດວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໝາ ຢູ່ ສປປ ລາວ

Facebook Twitter Email Whatsapp

ລະຫວ່າງວັນທີ 27 ຫາ 29 ກໍລະກົດ 2020 ນີ້ ຫ້ອງການພາຍໃນເມືອງໄຊຍະບູລີ ໄດ້ຈັດກອງປະຊຸມເຜີຍແຜ່ດຳລັດວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາ ຢູ່ ສາທາລະນະລັດ ປະຊາທິປະໄຕ ປະຊາຊົນລາວ ໂດຍການເປັນປະທານຂອງ ທ່ານ ຄຳຜາຍ ແກ້ວບົວ ຮອງເລຂາພັກເມືອງ ຜູ້ຊີ້ນຳວຽກງານການເມືອງ-ແນວຄິດ ເຂົ້າຮ່ວມມີ ທ່ານ ສົມບູນ ຄຳພູແສງ ຮອງຫົວໝ້າກົມຊົນເຜົ່າ ແລະ ສາສະໜາ ກະຊວງພາຍໃນ, ມີຫົວໝ້າພະແນກ, ຕາງໝ້າ ອພສ ແຂວງ, ຫົວໝ້າສາສະໜາ, ຫົວໜ້າຫ້ອງການພາຍໃນເມືອງ 06 ເມືອງ ເຂົ້າຮ່ວມ.

ກອງປະຊຸມເຜີຍແຜ່ຄັ້ງນີ້ ຜູ້ເຂົ້າຮ່ວມໄດ້ຮັບຟັງການເຜີຍແຜ່ດຳລັດກ່ຽວກັບການຄຸ້ມຄອງ ແລະ ປ້ອງກັນການເຄື່ອນໄຫວ ສາສະໜາຢູ່ ສາທາລະນະລັດ ປະຊາທິປະໄຕ ປະຊາຊົນລາວ ສະບັບເລກທີ 315/ລບ ແລະ ເອກະສານສົນທິສັນຍາ ທີ່ຕິດພັນກັບພັນທະຂອງ ສ ປ ປ ລາວ ກ່ຽວກັບສິດທິມະນຸດ.

ທ່ານ ຄຳຜາຍ ແກ້ວບົວ ຮອງເລຂາພັກເມືອງ ປະທານກອງປະຊຸມ ໄດ້ກ່າວເປີດກອງປະຊຸມວ່າ: ລັດຖະບານໄດ້ອອກນິຕິກຳກ່ຽວກັບການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາ ຢູ່ ສປປ ລາວ ເພື່ອເປັນບ່ອນອີງ ແລະ ຮັບປະກັນໃນການຈັດຕັ້ງປະຕິບັດ-ການເຄື່ອນໄຫວໃຫ້ຖືກຕ້ອງຕາມລະບຽບກົດໝາຍ, ກໍາໄດ້ແນວທາງຂອງພັກ-ລັດ. ພ້ອມນີ້, ທ່ານ ຍັງໄດ້ຮຽກຮ້ອງໃຫ້ຜູ້ເຂົ້າຮ່ວມກອງປະຊຸມຈົ່ງພ້ອມກັນເອົາໃຈໃສ່ຄົ້ນຄວ້າ, ເຊື່ອມຊຶມ ພ້ອມທັງປະກອບຄຳຄິດຄຳເຫັນບັນຫາຕ່າງໆ ດ້ວຍຄວາມຮັບຜິດຊອບສູງ.

ໃນຕອນທ້າຍຂອງກອງປະຊຸມ ທ່ານ ສົມບຸນ ຄຳພູແສງ ຮອງຫົວໝ້າກົມຊົນເຜົ່າ ແລະ ສາສະໜາ ກະຊວງພາຍໃນ ໄດ້ມີຄຳເຫັນເນັ້ນຕື່ມ ໃຫ້ບັນດາທ່ານຜູ້ເຂົ້າຮ່ວມກອງປະຊຸມ ຈົ່ງພ້ອມກັນນຳເອົາດຳລັດເລກທີ 315/ລບ, ເນື້ອໃນຈິດໃຈຂອງກອງປະຊຸມຄັ້ງນີ້ໄປເຜີຍແຜ່ ແລະ ຈັດຕັ້ງປະຕິບັດເຄື່ອນໄຫວໃຫ້ຖືກຕ້ອງຕາມລະບຽບການ.

ຂໍ້ມູນຈາກ: moha.gov.la