ກອງບັນຊາການທະຫານແຂວງວຽງຈັນ ສຳເລັດກອງປະຊຸມກວດກາຄືນພາຫະນະເຕັກນິກ ອາວຸດ-ກະສູນ.

ໃນວັນທີ 8 ກຸມພາ 2022 ນີ້, ກອງບັນຊາການທະຫານແຂວງວຽງຈັນ ໄດ້ສໍາເລັດກອງປະຊຸມສະຫຼຸບກວດກາຄືນພາຫະນະເຕັກນິກ ອາວຸດ-ກະສູນຍຸດໂທປະກອນ ທົ່ວກອງບັນຊາການ. ໂດຍການເຂົ້າຮ່ວມເປັນປະທານຂອງ ສະຫາຍ ພົນຕີ ປະສິດ ທຽງທຳ ຄະນະປະຈຳພັກກະຊວງ ຫົວໜ້າກົມໃຫຍ່ເຕັກນິກ ທັງເປັນຫົວໜ້າຄະນະສະເພາະກິດກວດກາຄືນພາຫະນະເຕັກນິ ອາວຸດ-ກະສູນ, ມີສະຫາຍ ພົນຈັດຕະວາ ບຸນມາ ວົງດາລາແສນ ຄະນະປະຈຳພັກແຂວງ ເລຂາຄະນະພັກ ຫົວໜ້າການທະຫານກອງບັນຊາການທະຫານແຂວງວຽງຈັນ, ມີບັນດາສະຫາຍຄະນະພັກ-ຄະນະບັນຊາອົງການ 5 ຫ້ອງ, ຫົວໜ້າກົມ-ຮອງກົມທີ່ກ່ຽວຂ້ອງ, ຕະຫຼອດຮອດພະແນກການທີ່ກ່ຽວຂ້ອງເຂົ້າຮ່ວມ

ໃນກອງປະຊຸມສະຫາຍ ພັນໂທ ວຽງຄໍາ ວິລະວົງ ຮອງຫົວໜ້າຫ້ອງເຕັກນິກທະຫານແຂວງວຽງຈັນ,ໄດ້ຂື້ນລາຍງານບົດສະຫຼູບຫຍໍ້ ເຊິ່ງໄດ້ຍົກໃຫ້ເຫັນສະພາບໂດຍລວມຂອງວຽກງານການຄຸ້ມຄອງພາຫະນະເຕັກນິກ ແລະ ອາວຸດ-ກະສູນຍຸດໂທປະກອນ ໃນທົ່ວທະຫານແຂວງຂອງຕົນ, ເຊິ່ງໄລຍະຜ່ານມາຄະນະພັກ-ຄະນະບັນຊາກອງບັນຊາການທະຫານແຂວງວຽງຈັນ ໄດ້ເອົາໃຈໃສ່ໃນການຊີ້ນໍາ, ການຄຸ້ມຄອງການນໍາໃຊ້ພາຫະນະເຕັກນິກ ແລະ ອາວຸດ-ລູກກະສຸນ ເປັນຕົ້ນແມ່ນ ການບົວລະບັດຜັດເຊັດ,ກວດກາຄຸນນະພາບຂອງອາວຸດເປັນປະຈໍາ, ພາກສ່ວນທີ່ເປ່ເພກໍໄດ້ມີ ການສ້ອມແປງຕາມຫຼັກວິຊາການໃຫ້ໄດ້ນໍາໃຊ້ຍາວນານ ເພື່ອຮັບປະກັນໃຫ້ແກ່ການກຽມພ້ອມສູ້ຮົບ ແລະ ສູ້ຮົບມີໄຊ, ທັງຮັບປະກັນໃນການນໍາໃຊ້ອົບຮົມ-ຫັດແອບຮໍ່າຮຽນທາງດ້ານການທະຫານຂອງກົມກອງ...

ຈາກນັ້ນຄະນະທີມງານຍັງ ໄດ້ລົງກວດກາສາງເກັບມ້ຽນ ອາວຸດຍຸດໂທປະກອນ, ໝວດລົດຫຸ່ມເກາະ, ກອງຮ້ອຍຂົນສົ່ງ ແລະ ກອງຮ້ອຍສ້ອມແປງ ເພື່ອກວດກາເບິ່ງຄວາມເປັນລະບຽບຮຽບຮ້ອຍ, ວິທີເກັບຮັກສາ, ການບົວລະບັດຜັດເຊັດພາຫະນະເຕັກນິກຕ່າງໆ, ຫຼັງຈາກນັ້ນກໍໄດ້ມີການສະຫຼຸບລາຍງານຄືນກ່ຽວກັບການລົງກວດກາອາວຸດຍຸດໂທປະກອນຕົວຈິງ, ໃນໂອກາດນີ້ ສະຫາຍ ຫົວໜ້າກົມໃຫຍ່ເຕັກນິກ, ພ້ອມດ້ວຍຄະນະວິຊາການ ກໍໄດ້ຜັດປ່ຽນກັນຂຶ້ນມີຄໍາເຫັນອະທິບາຍວຽກງານການຄຸ້ມຄອງ, ການນໍາໃຊ້ພາຫະນະເຕັກນິກ ແລະ ອາວຸດຍຸດໂທປະກອນໃຫ້ຖືກຕາມຫຼັກວິຊາການທີ່ຂັ້ນເທິງປະກອບໃຫ້.

ສໍາລັບການລົງເຄື່ອນໄຫວເຮັດວຽກຂອງຄະນະສະເພາະກິດໃນຄັ້ງນີ້, ເພື່ອກວດກາຄືນພາ ຫະນະອາວຸດ-ຍຸດໂທປະກອນ ເຕັກນິິກທາງດ້ານຈໍານວນ, ຄຸນນະພາບ ແລະ ການປະກອບຄົບ ຊຸດແຕ່ລະຊະນິດພາຫະນະອາວຸດເຕັກນິກ ເພື່ອສ້າງໃຫ້ໄດ້ບັນຊີລວມສູນທີ່ເປັນເອກະພາບ ເພື່ອຮັບປະກັນໃຫ້ແກ່ການຂຶ້ນແຜນຈັດຊື້-ຈັດຫາໃໝ່,ຈັດຊື້ອາໄຫຼປ່ຽນຖ່າຍ, ການຂຶ້ນແຜນງົບປະມານສ້ອມແປງ ແລະ ຟື້ນຟູຄືນ.

ໂອກາດດັ່ງກ່າວຍັງໄດ້ຮັບຟັງການໂອ້ລົມ ຈາກ ສະຫາຍ ພົນຕີ ປະສິດ ທຽງທຳ ເຊິ່ງກ່ອນອື່ນສະຫາຍ ໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະພັກ-ຄະນະບັນຊາ ກອງບັນຊາການທະຫານແຂວງ ທີ່ໄດ້ເອົາໃຈໃສ່ໃນການຊີ້ນໍາ-ບັນຊາ ແລະ ໃກ້ຊິດຕິດແທດພະນັກງານວິຊາການທີ່ກ່ຽວຂ້ອງ ໃນວຽກງານຮັບປະກັນທາງດ້ານພາຫະນະເຕັກນິກ ແລະ ອາວຸດຍຸດໂທປະກອນ

ພ້ອມທັງໄດ້ຮຽກຮ້ອງໃຫ້ຄະນະພັກ-ຄະນະບັນຊາສືບຕໍ່ເອົາໃຈໃສ່ໃນການຕິດຕາມກວດກາບັນຊີຕົວເລກການນໍາໃຊ້ພາຫະນະເຕັກນິກ ຕ່າງໆໃຫ້ຖືກຕ້ອງ, ດ້ານແບບແຜນວິທີເຮັດວຽກໃຫ້ມີຄວາມເປັນເອກະພາບໃນທຸກຂົງເຂດວຽກງານ ເພື່ອເຮັດໃຫ້ກົມກອງກາຍເປັນກົມກອງທີ່ມີແບບແຜນທີ່ທັນສະໄໝ ພ້ອມກັນເຮັດສໍາເລັດໜ້າທີ່ຕາມລະດັບຄາດໝາຍທີ່ວາງໄວ້ໃນສະເພາະໜ້າ ແລະ ຍາວນານ.

ໂດຍ: ຈັນທະຈອນ ສີສະເກດ