ໂຮງຮຽນທະຫານທ້ອງຖິ່ນແຂວງວຽງຈັນ ປິດຊຸດອົບຮົມທະຫານໃໝ່ປະຈໍາປີ 2021

ໃນຕອນເຊົ້າຂອງວັນທີ 01 ເມສາ 2022 ນີ້, ໂຮງຮຽນທະຫານທ້ອງຖິ່ນແຂວງວຽງຈັນ ໄດ້ຈັດພິທີປິດຊຸດອົບຮົມທະຫານໃໝ່ ປະຈຳປີ 2021, ພາຍຫຼັງທີ່ໄດ້ອົບຮົມຫັດແອບມາເປັນເວລາ 90 ວັນ, ໂດຍການເປັນປະທານຂອງ ສະຫາຍພົນຈັດຕະວາ ຄໍາເຄນ ອຸດຕະມາ ຮອງເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງວຽງຈັນ,

ມີຄະນະພັກ-ຄະນະບັນຊາອົງການ 5 ຫ້ອງ, ຄະນະອຳນວຍການໂຮງຮຽນ, ຄູ-ອາຈານ ແລະ ທະຫານໃໝ່ເຂົ້າຮ່ວມ.

ສະຫາຍ ພັນໂທ ເທບພະນົມ ພະກະຊຸມ ຫົວໜ້າການທະຫານໂຮງຮຽນທະຫານທ້ອງຖິ່ນແຂວງ ວຽງຈັນ ໄດ້ຂຶ້ນຜ່ານບົດສະຫຼຸບຕີລາຄາຄືນ ຕະຫຼອດໄລຍະເຝິກແອບຮໍ່າຮຽນ ເຊິ່ງໄດ້ຍົກໃຫ້ເຫັນໃນການເຝິກແອບຮໍ່າຮຽນສາມາດປະຕິບັດ ແລະ ບັນລຸຕາມແຜນການອົບຮົມ ມັນສະແດງອອກຄື:

ວິຊາການເມືອງ ຂັ້ນເກັ່ງ 95 ສະຫາຍ, ເທົ່າກັບ 45,67%, ກາງ 113ສະຫາຍ, ເທົ່າກັບ 54,32%, ວິຊາລະບຽບ-ກິລາ ຂັ້ນເກັ່ງ 87ສະຫາຍ, ເທົ່າກັບ 41,82%ຂັ້ນກາງ 121 ສະຫາຍ, ເທົ່າກັບ 58,17%, ວິຊາສິນລະປະຍຸດ, ເກັ່ງ 87 ສະຫາຍ, ກາງ 121 ສະຫາຍ, ວິຊາຍຸດທະວິທີ ຂັ້ນເກັ່ງ 94 ສະຫາຍ, ກາງ 114 ສະຫາຍ, ພະລາທິການ ຂັ້ນ 95 ສະຫາຍ, ກາງ 113 ສະຫາຍ, ຄະນະແນນສະເລ່ຍທັງໝົດ 78,16%,

ຕີລາຄາຄຸນນະພາບການຮຽນ ຂັ້ນກາງ, ຈາກນັ້ນກໍ ໄດ້ມອບໃບຢັ້ງຢືນໃຫ້ທະຫານໃໝ່ຈຳນວນ 209 ສະຫາຍ, ຍິງ 10 ສະຫາຍ ,ເປັນກຽດມອບໂດຍແມ່ນສະຫາຍ ພັນໂທ ມີໄຊ ສິງວົງທຳ ຫົວໜ້າການເມືອງໂຮງຮຽນ ທະຫານທ້ອງຖິ່ນແຂວງວຽງຈັນ,

ພ້ອມດຽວກັນນັ້ນຍັງໄດ້ມອບໃບຍ້ອງຍໍຂັ້ນກອງບັນຊາການ ແລະ ຂັ້ນໂຮງຮຽນໃຫ້ອ້າຍນ້ອງທະຫານໃໝ່ຜູ້ທີ່ຮຽນດີ ຮຽນເກັ່ງ ແລະ ປະຕິບັດກົດລະ ບຽບ ວິໄນດີຈຳນວນໜຶ່ງ.

ໂອກາດນີ້ ສະຫາຍ ພົນຈັດຕະວາ ຄໍາເຄນ ອຸດຕະມາ ຫົວໜ້າການເມືອງກອງບັນຊາການທະຫານແຂວງວຽງຈັນ ກໍໄດ້ໂອ້ລົມ ເຊິ່ງໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະຮັບຜິດຊອບ ແລະ ອ້າຍນ້ອງທະຫານໃໝ່ທີ່ໄດ້ພ້ອມກັນສໍາເລັດຊຸດອົບຮົມໃນຄັ້ງນີ້ ແລະ ຮຽກຮ້ອງໃຫ້ອ້າຍນ້ອງທະຫານໃໝ່ ທຸກສະຫາຍຈົ່ງເພີ່ມທະວີຄວາມສາມັກຄີເປັນປຶກແຜ່ນ

ເຊື່ອໝັ້ນ ຕໍ່ການນຳພາຂອງພັກກຳໄດ້ທິດສະດີຫຼັກການ ແລະ ນຳເອົາບົດ ຮຽນທີ່ຮຽນມາ ເພື່ອປະກອບ ສ່ວນເຂົ້າໃນການປະຕິບັດໜ້າທີ່ ໃຫ້ປາກົດຜົນເປັນຈິງ.

ພາບ-ຂ່າວ ໂດຍ: ສາຍຄໍາ ພອນມະນີ